नवी दिल्ली-नवी दिल्ली विधानसभा निवडणुकीत अरविंद केजरीवाल आणि भाजपचे प्रवेश वर्मा यांच्यात चुरशीची लढत झाली यात केजरीवालांचा पराभव झाला आहे. मनीष सिसोदिया यांना जंगपुरा येथून पराभवाचा सामना करावा लागला आहे. कालकाजीमधून आतिशी यांनी भाजपच्या रमेश बिधूडी यांच्यावर निसटता विजय मिळवत आपली जागा वाचवली आहे. एकूण जागांच्या बाबतीत भाजप सध्या ४९ जागांवर आघाडीवर आहे आणि आप २१ जागांवर आघाडीवर आहे, तर काँग्रेसला अद्याप खातेही उघडता आलेले नाही.
राजधानी दिल्‍लीत आज (दि. ८) सकाळी कडक सुरक्षेत मतमोजणीला प्रारंभ झाला होता. ७० जागांसाठी ६९९ उमेदवार निवडणूक रिंगणात होते. ५ फेब्रुवारी रोजी १३ हजारांहून अधिक मतदान केंद्रांवर एकूण ६०.५४ टक्के मतदान झाले होते. नवी दिल्ली मतदारसंघात मतमोजणीच्या ८ फेऱ्यांनंतर अरविंद केजरीवाल पिछाडीवर राहिले. भाजप उमेदवार प्रवेश वर्मा यांनी आघाडी कायम ठेवली. मतमोजणीच्या १३ फैर्‍यांपैकी दहाव्‍या फेरीत केजरीवाल हे १८४४ मतांनी पिछाडीवर राहिले. अखेर मतमोजणीच्या १४ फैर्‍यानंतर प्रवेश वर्मा यांचा ४०८९ मतांनी विजय झाला.
अरविंद केजरीवाल यांनी २०१३ च्या विधानसभा निवडणुकीत नवी दिल्ली मतदारसंघात तत्‍कालीन मुख्‍यमंत्री शीला दीक्षित पराभव केला होता. यानंतर त्‍यांनी तीन वेळा या विधानसभा मतदारसंघातचे प्रतिनिधित्व केले होते. विशेष म्‍हणजे या मतदारसंघात दिवगंत माजी मुख्‍यमंत्री शीला दीक्षित यांचे पुत्र संदीप दीक्षित यांनीही निवडणूक लढवली हाेती. केजरीवालांच्‍या पराभवात संदीप यांचेही याेगदान राहिले. ते स्‍वत: पराभूत झाले असले तरी केजरीवालांना धक्का दिल्‍याचे समाधान त्‍यांना लाभले आहे.
Leave a Reply